博客日记

WWDC 16 vs IO16WWDC 16 vs IO1

继上个月去咗 Google I/O 之后,上个礼拜笔者又去咗 Apple WWDC,同 I/O 一样,今次係笔者首次参与WWDC,估唔到一係唔去,一係就一个月内去晒两个开发者大会,确实大开眼界,感觉充实之余,老实讲⋯⋯都几攰吓!家阵笔者係争 Microsoft Build 未参与过,睇吓出年有无机会啦!

WWDC 出嘅新嘢请睇内文,笔者反而想讲吓去完 WWDC 同 I/O 嘅感觉。个人主观觉得今次 I/O 响户外场地搞(以往绝大多数响室内),地方好大,会场布局好有嘉年华嘅气氛,感觉好 Free 好舒服,但要日晒雨淋,除咗比 Developer 嘅 Talk,现场亦有好多 Demo 可以同开发者边试边玩边倾;至于 WWDC 嘅模式较传统,除咗 Keynote,WWDC 会场(Moscone West)入面主要都係比开发者嘅「教学」,笔者嘅可参与程度就不及 I/O。

至于 Apple 今次 Focus 晒响各个 OS 平台之上,好多人都将焦点放响 iOS 10,仲话 Apple 今次将好多人哋已经有嘅嘢「放」咗落 iOS 度,甚至有人话係「抄袭」,仲特登大造文章嚟个对照话係自已出先,如果理解成为边个出先就係正货,其他就係「抄袭」呢个道理嘅话,试问家阵有边个唔係抄 iPhone 嘅模式呢?笔者唔会偏帮任何一边,亦觉得「人有我有」无咩大不了,唔通我哋有女版主先,人哋又整个女版主出嚟就係抄袭咩!咁极其量只係跟风,亦证明呢样嘢係 Work 嘅,同埋大家都受嘅咪得啰!做好佢、做大佢,大家都有好处!起码对开发者嚟讲係好事。

相比起嗰啲上市公司嘅话事人,竟然话「假货质素比真货好」,仲话买/卖假嘢实属正常、係理所当然咁,将歪理扭曲到变真理,仲讲到理直气壮、係为大家好咁样,正正当当咁「人有我有」点都好过「舢舨充砲艇」!真心想问点解会有咁多呢啲埋没良心、只顾利益嘅人上到高位,然后要比佢哋去蚕食、摧毁我哋呢个原本正常嘅世界?